Selið í Hallormsstaðaskóla (1. - 4. bekkur)

NÁMSHÓPURINN
Í Selinu í Hallormsstaðaskóla eru núna saman í samkennsluhópi fjórir árgangar, 1. - 4. bekkur. Þessum samkennsluhópi var breytt haustið 2002 en áður voru í Selinu 1. - 3. bekkingar. Ástæður þess að samkennsluhópnum bar breytt voru bæði faglegar og fjárhagslegar. Aðalnámskrá grunnskóla frá 1999 er skipt upp þannig að námsmarkmið í 1. - 4. bekkur eru sett fram í samhengi og þessir árgangar eru einnig með sama kennslustundafjölda í viku hverri (30 stundir). Það að stækka námshópinn eykur samkennsluna og sparar því ákveðinn fjölda kennaratíma og þannig ákveðið fjármagn.

STUNDASKRÁ
Kennarar í Selinu vinna stundaskrána að mestu sjálfir þó er ákveðið af stjórnendum í samhengi við aðra stundaskrárgerð í skólanum hvaða kennarar kenna hvaða lotur. Hvenær skiptiloturnar eru (þá eru tveir kennarar með hópinn í einu) byggist á samráði milli kennara og skólastjórnenda.
Allir tímar í Selinu nema íþróttir og tónmennt heita því á stundaskrá hjá nemendum
SELIÐ (ZE), SELIÐ (SH) eða SELIÐ (ZE/SH). Kennarar skipuleggja síðan sjálfir nýtingu kennslutímans og hafa í því sambandi hliðsjón af viðmiðunarstundaskrá (Aðalnámskrá grunnskóla frá 1999).
Veturinn 2001 - 2002 voru 4,0 skiptilotur (70 mín) í Selinu eða sjö 40-mín-kennslustundir.
Veturinn 2002 - 2003 voru 7,5 skiptilotur (70 mín) í Selinu eða rúmar þrettán 40-mín-kennslustundir

ÁÆTLANAGERÐ - VIKUÁÆTLANIR
Hvert barn gerir áform einu sinni í viku (íslenska, stærðfræði, samfélagsfræði, kristinfræði og náttúrufræði). Fyrstu bekkingum er töluvert stýrt til að byrja með en upp úr áramótum fara þeir að gera þetta mikið til sjálfir (þarf að vísu stundum að aðstoða þau við að skrifa). Kennararnir hafa skipt náminu niður á vikurnar þannig að þeir hafa yfirsýn yfir hvað hver árgangur þarf að gera að lágmarki í viku hverri til að komast yfir námsáætlun vetrarins. Á meðan að áformað er eru árgangarnir saman á svæði og kennararnir fara á milli eða taka eitt og eitt barn til sín. Kíkt er yfir hvað þau hafa gert og kennari kvittar gjarnan í áformið við að hann hafi skoðað viðkomandi áætlun. Skoðanaskipti fara fram milli kennara og nemenda um síðustu áætlun og þá næstu. Nemendur eru gjarnan látnir sjálfir finna út hvað þeim hentar að gera mikið í hverri viku, sem sagt látnir reka sig á.

Í áformsbókunum er ákveðið rúm fyrir skilaboð milli kennara og foreldra. Heimanám er nokkuð og telja kennarar það nauðsynlegt til að virkja foreldra í námi barna sinna. Ákveðin heimanámsstefna er kynnt fyrir foreldrum í upphafi skólaárs.

Þegar nemandi hefur ákveðið hvað hann ætlar að gera skráir kennari það hjá sér til að hafa yfirlit yfir vinnu hvers nemanda. Í hverri viku eru ákveðnar vinnulotur þar sem nemendur vinna sjálfstætt að sínum áformum. Besta raun hefur gefið að gera áformið (hafa áformstímann) um miðja viku, ekki á mánudegi eða föstudegi. Um 1,5 lota á viku er sérstaklega áætluð í áformstíma (105 mín) í hverri viku.

Umsjónarkennarar í Selinu eru tveir og hefur hvor um sig yfirumsjón með áætlanagerð í ákv. námsgreinum fyrir alla árgangana, annar með íslensku og náttúrufræði og hinn með stærðfræði og samfélagsfræði, þetta skapar samfellu í náminu og sparar undirbúningstíma kennara. Saman sjá þeir svo um list og verkgreinar. Nauðsynlegt er þó að báðir séu vel inni í námi og kennslu í öllum greinum því kennararnir skipta því með sér að gera áform með ákveðnum nemendum. Mismunandi hefur verið milli ára hvort kennarar eiga áformsnemendur úr öllum árgöngum eða skipta árgöngunum á milli sín.

NÁMSMAT
Áformstímarnir eru notaðir til þess að nemandinn og kennarinn skoði saman það sem gert hefur verið og meti það sameiginlega. Fullkláruðum verkefnum (séu þau á pappír) er safnað í möppu (portfolio) og fara í árbókina. Kennarar setja gjarnan svokölluð stoppmerki í bækurnar/námsefnið og nemendur vita að þegar að þeim er komið þurfa þeir að meta hvernig þeir hafa náð því sem búið er áður en lengra er haldið. Kennarar taka einnig öðru hverju vinnu nemenda og fara nákvæmar yfir hana og svo eru kannanir og próf líka ef þörf er á. Verið er að vinna að útfærslu á verkmöppumati fyrir nemendur í Hallormsstaðaskóla og verður það einnig í Selinu.

NÁMSEFNI
Val á námsefni er mismunandi og fer eftir getu nemenda í hverri námsgrein, það er því fremur algengt að nemendur í sama árgangi séu með mismunandi námsefni og vinni hver á sínum hraða. Sumu námi er skipt niður í áfanga og er þá víxlkennt námsefni, t.d. eru 1. og 2. bekkur gjarnan saman í samfélagsfræði og svo 3. og 4. bekkur. Námsefninu er þá skipt niður í áfanga t.d. A og B og er þá áfangi A kenndur annað árið og B hitt. Söguaðferðin er mikið notuð til hvers konar samþættingar námsgreina ekki síst í samfélagsfræði og náttúrufræði.

NÁMSUMHVERFI - MYNDIR
Í grunninn er rýminu skipt upp í tvennt (bókasafnsgang og Seljastofu). Þannig skapast m.a. möguleiki á því að taka út ákveðinn hóp nemenda vegna sérstakrar umfjöllunar.

BÓKASASFNSGANGUR
Heimakrókur (næðiskrókur - lestrarhorn)
Megin markmið með honum er að hafa einn stað í stofunni þar sem hægt er að hafa allan hópinn saman í einu. Þar er einnig aðstaða fyrir nemendur til að lesa við notalegar aðstæður og/eða hvíla sig. Þar eru dýnur og púðar sem nemendur hafa sjálfir gert, hver fyrir sig, bókahilla og flettitafla.
Bókasafnshorn (1. bekkjarhornið)
Meginmarkmið með því er að hafa einn stað í stofunni þar sem hægt er að vera með minni hópa alveg sér t.d. einn árgang og er þá sérstaklega verið að hugasa um 1. bekkinn til að byrja með. Þar er skólatafla, bókasafn og nettengd tölva/ur.

SELJASTOFAN
Stofunni sjálfri er síðan skipt niður í fimm svæði sem með skilrúmum. Fyrst skal nefna áformshornið eða lestrarhorið en þar getur kennari tekið eintaka nemanda til sín til að skoða áformið, láta lesa o.þ.h. Hin svæðin eru fjögur og draga nafn sitt af þeim litum sem notaðir eru til að skipta valverkefnum niður á svæði en á þeim er einnig komið fyrir gögnum sem tilheyra ákveðnum námsgreinum. Fjöldi þessara svæða fer gjarnan eftir því hvað námshópnum er skipt niður í marga valhópa (4 - 5 nemendur í hverjum valhópi). Stundum er skipt niður í bekkjarhópa, það myndar tengsl milli jafnaldra og er tilbreyting frá því að vera í valhópunum, því þurfa svæðin alla vega að vera fjögur.
Á hverju svæði eru bæði hópborð og einstaklingsborð þar sem það hentar ekki öllum að vinna við hópborð.
Svæðin í stofunni heita:
Áformshornið - Leshornið
Bláa svæðið
Appelsínugula svæðið
Bleika svæðið
Gráa svæðið

NÁMSVAL
Sjá annars staðar - sér kafli um það