Markmiðið þessa vefs er tvíþætt:

Annars vegar er hann ætlaður sem almenn fræðsla og upplýsingabrunnur um samkennslu árganga og starf í skólum þar sem námshópar eru aldursblandaðir. Kennarar og aðrir geta sótt sér þessa fræðslu og bergt af að vild þegar þá þyrstir.

Hins vegar er vefurinn einnig hugsaður sem vefnámskeið þar sem markmiðið er að efla þekkingu og færni kennara sem kenna í aldursblönduðum bekkjum. Á námskeiðinu munu þeir:

• öðlast þekkingu og skilning á hugmyndafræði samkennslu árganga og taka til hennar rökstudda afstöðu,
  
  
• læra um ólíkar leiðir sem farnar eru við skipulag samkennslu,
  
  
• kynnast nokkrum kennsluaðferðum sem nýtast við samkennslu,
  
  
• læra að skipuleggja nám og kennslu með tilliti til aldursblöndunar og valinna kennsluaðferða,

Einnig er markmið að vefurinn

• skapi grundvöll að samskiptum og umræðum kennara um kennslu í aldursblönduðum hópum, þ.e. samkennslu,
  
  
• verði vettvangur sem kynnir hugmyndafræði og vinnubrögð við samkennslu.

Um námskeiðið

Námskeiðið er skipulagt sem vefnámskeið sem byggir á lesefni, krækjusafni og verkefnum sem m.a. verða fólgin í að búa til dæmi um útfærslur og ræða saman á vefborði um þau.

Þátttakendur geta hafið ferðina á að lesa inngang um fámenna skóla og vinna upp stöðulýsingu á eigin skóla og kennslu.

Þá ættu allir að vinna með hugmyndafræði samkennslu.

Einnig velja þátttakendur sér kennsluðaferðir sem þeir vilja dýpka skilning sinn á og reyna í kennslu.

Vefurinn gefur loks færi á að skoða hugmyndir um skipulag samkennslu og námsmat í samkennslu sem hægt er að velja að vinna með.

Umræðusvæðið er ætlað öllum sem þátt taka og verður þar með tímanum virkur samskiptavettvangur kennara um allt land sem kenna við fámenna skóla.