Þú ert í vefleiðangri um samkennslu árganga.

Ferli:

Það fyrsta sem þú gerir þegar þú ert búin/n að lesa bréfið er að setjast niður og senda tölvuskeyti til Fríðar sveitarstjóra og setja fram fyrstu viðbrögð þín við þeirri hugmynd að leggja niður Litlaskóla. Rökræddu hugmyndina og láttu koma fram minnst fimm rök með og önnur fimm á móti því að leggja niður skólann vegna þess að þar er samkennsla árganga.

Eftir að hafa velt málinu fyrir þér hittir þú skólanefndarmenn (sem eru samkennarar/samnemendur þínir sem taka þátt í þessu námskeiði) og þið skipuleggið ykkur.

Ágætur grunnlestur fyrir alla hópa er grein Rúnars Sigþórssonar um samkennslu.

Þið vinnið einstaklingslega eða í hópum (2-3 saman) og hlutverk ykkar er að vera sveitarstjórn til ráðgjafar um framtíð Litlaskóla. Því þurfið þið að taka rökstudda afstöðu til þeirrar hugmyndar að leggja Litlaskóla niður á þeim forsendum að vegna þess að hann er fámennur skóli uppfylli hann hugsanlega ekki lögbundin markmið um skólastarf. Ef margir kennarar sama skóla taka námskeiðið saman geta þeir skipt verkum á hópana. Í lokin setjið þið öll saman skýrslu ykkar eða kynningu fyrir sveitarstjórn svo hún geti tekið rökstudda ákvörðun í þessu máli. Þið getið skipt með ykkur verkum ef þið vinnið í hópum, t.d. við leit, lestur og framsetningu efnisins. Einnig að koma ykkur saman um hvernig þið ætlið að kynna niðurstöður ykkar. Þið getið gert það í rituðu máli, með glærukynningu, með vefsíðu eða á annan hátt sem hentar ykkur. Munið að mikilvægt er að þið rökræðið viðfangsefnið frá báðum hliðum - dragið fram kosti og galla þessa skólaforms.

Hvað segja rannsóknir og reynsla ykkar og annarra um áhrif samkennslunnar á:

• kennsluaðferðir og skipulag náms almennt og í einstökum greinum
• innihald námsins
• áhrif aldurs nemenda á framkvæmd samkennslunnar
• áhrif nemendafjölda í námshópum á framkvæmd samkennslunnar
• samskipti nemenda og aðra félagslega þætti
• fagmennsku og starfsþróun kennara
• tengsl við umhverfið
• annað sem ykkur finnst máli skipta
  

Niðurstöður ykkar setjið þið inn á vefinn eða þær verða settar inn fyrir ykkur og saman skapa hóparnir skýrsluna sem skólanefndin óskar eftir.

Þegar þið hafið tekið saman það sem þið hafið komist að berið niðurstöður ykkar þá saman við ykkar eigin reynslu í kennslu. Þið þurfið einnig að kynna ykkur niðurstöður annarra hópa og berið niðurstöður þeirra saman við ykkar eigin reynslu í kennslu. Þið takið þátt í umræðu í málstofu um niðurstöðurnar og reynslu ykkar.

Hjálpargögn ykkar við vinnuna eru á efnissíðunni

Mat:

Mat á niðurstöðum er byggt á hvernig tekst til við að koma fram upplýsingum sem um er beðið og hvernig þátttaka er í málstofu á vefnum.